Joar Nango tusarnaariaruk

Norskip illussanik titartaasartup eqqumiitsuliortullu aamma nunarsuatsinni tusaamasaasup, Joar Nangop qiperugarsualiassani kikkunnullu tamanut takutitassiassani pillugu saqqummiissaaq.

Joar Nangop eqqumiitsuliortoqatini isummersoqatigisartakkanilu, å Fortette Byen (FFB), peqatigalugit Katuap Ikinngutigiit inersuaaraani ataasinngorpat februaarip 20-anni saqqummiissapput. Saqqummiinerminni oqaluttuarissallugu, Nuuk Nordisk Kulturfestival 2017-ip ukiamut Nuummi pisussami, qiperugarsuarmik kikkunnit tamanit takuneqarsinnaasumik eqqumiitsuliorniussap pilersaarutigineqarnera.

”Joar Nango aamma FFB-imi isummersoqatigiit Nuuk Nordisk Kulturfestival 2017-imut peqataanissaannik qaaqquneqarput, tassani pinngortitaq atorlugu eqqumiitsulianik sanaartussallutik. Eqqumiitsuliortartoqatigiit aamma misissussavaat Nunatsinni illulioriaatsit, kulturerput, atortussat, pinngortitaq. Taakkulu tamaasa atorlugit kikkunnit tamanit takuneqarsinnaasumik pinngortitami qiperugarsualiussallutik – qaqugorsuarmut Nuummi takuniarneqarsinnaasumik”, Nuuk Nordisk Kulturfestival 2017-ip pilersaarusiortui, Pipaluk Lind aamma Rickard Borgström oqaluttuarput imalu nangillutik:

”Pinngortitami eqqumiitsuliat takusassiarineqarnissaat elektroniskimit nipilersornermik festivali, NAQQARMIUT suleqatigalugit pisussaavoq”.

Nangop eqqumiitsuliai inuit atugaat kulturilu pillugit, saqqummersinneqartarput pinngortitami imaannaanngitsumi pissaganartumilu, tassalu pinngortitamik atuisarnera pillugu festivalimut qaaqquneqarsimalluni.

”Nuuk Nordisk Kulturfestival 2017-imit ersersinniarneqarpoq eqqumiitsuliornernit soorlu qitinnernit, isiginnaartitsinernit, pinngortitamut pisussuartnernit, qiperukkanit, filminit illussanillu titartaanernit illoqarfiup nunataata atorneqarsinnaanera aamma ineriartortinneqarsinnaanera. Taamaaliornermi illioqarfiup innuttaasa peqataatinneqarnissaat kissaatigineqarluni,” Pipaluk Lind aamma Rickard Borgström oqarput.

Pilersaarummik tamassuminnga saqqummiineq pissaaq ataasinngorpat februaarip 20-anni unnukkut nalunaaqutaq 20.00-miit 21.30-p tungaanut tamanna pissalluni Katuami Ikinngutigiit Inersuaraani. Saqqummiineq tuluttut ingerlanneqassaaq kalaallisullu nutserisoqassalluni. Kikkut tamarmik saqqummiinermut tikilluaqqusaapput isernerlu akeqassanani.

”Kommuneqarfik Sermersuup eqqumiitsulianik kulturimillu suliaqartarnerit pingaartittarpai. Maanilu eqqumiitsuliassap suliarineqarnerani neriuutigaarput eqqarsalersinneqassasugut qanoq najugaqariaaseqarnerluta, qanoq illulioriaaseqarnerluta, qanoq peqatigiittariaaseqarnerluta aamma pinngortitaq qanoq atortarneripput,” Kommuneqarfik Sermersuumi Pilersaarusiornermut ingerlatsisoq, Bilo Høegh Stigsen oqarpoq.

Nuuk Nordisk Kulturfestival 2017 oktobarip 16-ianniit 21-ata tungaanut ingerlanneqassaaq, eqqumiitsuliortullu 200-niit 250-init ikinnerunngitsut sapaatip akunnerata ataatsip ingerlanerani eqqumiitsuliaminnik takutitseqattaassallutik. Festivali Nunani Avannarlerni Piorsarsimassutsikkut Attaveqaammit (NAPA) aamma Kommuneqarfik Sermersuumit suliarineqarpoq.